Text Size

Font size:  
  • Increase
  • Decrease
  • Normal

Current Size: 100%

Kralendijk - Segun resolushon 45/106 di 14 di dezèmber 1990 di Nashonnan Uní riba e fecha 1e di òktober gran parti di mundu ta selebrá “dia di grandinan”. Na Boneiru tur aña di nobo grandinan ta sentro di atenshon i ta bin huntu den diferente selebrashon.

Manera tur aña, pa 2018 Nashonnan Uní a skohe un tema: Selebrando e kampionnan di derechonan humano di grandinan”.

Aki na Boneiru nos pensamentu ta bai riba esnan ku for di den siglo pasá a hasi esfuersonan pa kuido di grandinan, pa introdusí penshun di behes pa grandinan, pa stipulá un edat rasonabel pa baha ku penshun. Otro logro basá riba esfuersonan tabata introdukshon di fondo di penshun pa empleado públiko i pa empleadonan den sektor di refineria .Mas despues mester menshoná esnan ku a trese alivio pa grandinan solitario, ku nesesidat di kuido i atenshon diario, sea den kas di grandi òf den nan propio kas. Otro desaroyo signifikante ta lantamentu di pasadia pa grandinan i organisashonnan pa 60plùs den bario.

E komunidat Boneriano i esun Antiano, na kua Boneiru a permanesé te 2010, a karakterisá su mes pa personanan i organisashonnan ku a sa di sali na vanguardia i defensa di grandinan, tantu pa loke ta trata aspektonan material, komo inmaterial. Kaminda ku a traha riba fasilidatnan pa personanan ku defisiensia den mobilidat, di bista òf oido, esaki semper a resultá den un adelanto pa e grandinan ku hopi biaha pa motibu di edat haltu ta konfrontá e tipo di problemanan ei.

Loke ku durante tur tempu a resaltá aki na Boneiru, ta ku nos kampionnan di derechonan humano di grandinan a mustra di ta superkampion den pensa i traha huntu pa realisá logronan i adelanto pa grandinan. Den esei nan por ta ehèmpel kon ku poko medio, pero ku un vishon bon kla, ku determinashon i ku kreatividat por yega hopi leu.

Ku sosten finansiero i apoyo di gobièrnu di Boneiru organisashonnan a haña otro i pa algun aña kaba tin un enorme forsa boluntario ta hinka su skouder bou di aktividatnan pa nos grandinan, manera ta e kaso awe dia di grandinan.

Diputado Edsel Cecilia na nòmber di Kolegio Ehekutivo di Boneiru ta ekstendé felisitashon na nos grandinan di Boneiru i ta deseá nan un felis i plasentero dia. Na tur ku diariamente òf riba base regular ta duna nan tempu, esfuerso i prinsipalmente nan kariño na nos grandinan, un danki di kurason. Si tin derecho ku ta para riba tur ta esun pa risibí kuido, amor, kariño i protekshon. Kampion boso ta !!!

Contact
Bestuurskantoor Openbaar Lichaam Bonaire
Plasa Reina Wilhelmina 1
Kralendijk
T +599 717 5330

Klik hier voor de contactgegevens van alle diensten van het OLB