Text Size

  • Increase
  • Decrease
  • Normal

Current Size: 100%

Q & A COVID-19 Bonaire - PAP

HENDENAN KU TA BIAHA PA BONEIRU

KUA TA E PAISNAN KU NA E MOMENTU AKI BONEIRU TA KONSIDERÁ KOMO RIESGO ABOU PA COVID-19?

Entrante 1 di yüli 2020 esakinan ta pa Boneiru:

- E islanan ku ta den e ‘air-bubble’: Aruba, Kòrsou, Saba, St. Eustatius i St. Maarten.

- Hulanda

- Alemania

- Bélgika

- Fransia

- Luxemburg.

Asina ku esaki kambia, lo anunsiá esaki mas pronto posibel.

KUA TA E KONDISHONNAN PA POR BIAHA PA BONEIRU?

Bo por biaha pa Boneiru si bo:

- yena un deklarashon di salú.

- a permanesá minimalmente 14 dia konsekutivo den un pais di riesgo abou pa COVID-19 (na e momentunan aki esakinan ta e ‘air-bubble’ Aruba-Boneiru-Kòrsou, Saba-St. Eustatius-St. Maarten, Hulanda, Alemania, Fransia, Bèlgika i Luxemburg).

o Si bo no ta kumpli ku esaki, direktamente despues di yegada bo tin ku bai den karentena (riba gastu propio).

- na momentu di salida di e pais bo no tin keho ku ta kuadra ku COVID-10 (fèrkout di nanishi, doló di garganta, tosamentu, nistermentu, pèrdida di holó i sabor, kayente di kurpa, kentura).

- e último 14 dia bo no tabatin kontakto direkto ku un pashènt di COVID-19 konfirmá.

Boneiru ta konsehá tur hende ku tin 13 aña òf mas, i ku ke biaha pa Boneiru, pa pasa un tèst di COVID-19. Na momentu ku e persona ta sali pa Boneiru resultado di e tèst aki no mester ta mas bieu ku 72 ora.

Banda di esei Boneiru ta konsehá hendenan ku ta biaha pa Boneiru pa kontrolá si nan ta sigurá pa gastunan di malesa durante nan estadia na Boneiru, i si esaki no ta e kaso, sera un seguro di biahe pa esaki.

DIKON MI TIN KU SERA UN SEGURO DI BIAHE?

Gastunan médiko ku un biahero hasi na Boneiru ta pa su propio kuenta, gastunan relashoná ku COVID-19 tambe. Biaheronan mes ta responsabel pa sera un seguro di biahe.

Tuma kontakto ku bo kompania di seguro pa averiguá si nan ta kubri gastunan ku bo a hasi pa kuido médiko na Boneiru.

14 DIA PROMÉ KU MI FECHA DI BIAHE MI TABATA NA UN PAIS DI RIESGO HALTU: KIKO TA E PROSESO SI TÒG MI BULA BAI BONEIRU?

Den e deklarashon di salú ku tur hende ku ta biaha mester yena, a inkluí un pregunta si e biahero tabata ménos ku 14 dia pasá den un pais di riesgo haltu. Empleadonan di GGD ta kontrolá e deklarashon di salú i nan ta presente na aeropuerto.

Si bo tabata ménos ku 14 dia pasá den un pais di riesgo haltu, na bo yegada na Boneiru nan ta supliká bo pa koperá ku kuido di salú públiko, i bai den karentena durante 14 dia.

E dòkter di kombatimentu di malesa infeksioso di Entidat Públiko Boneiru por disidí pa konsehá Gezaghèber pa obligatoriamente pone personanan individual den karentena na nan yegada na Boneiru. E dòkter ta hasi esaki na momentu ku e, a base di su konklushonnan, tin sospecho ku e persona en kestion tin un infekshon, o sea un riesgo haltu di infekshon, i e persona ta nenga di koperá. Gezaghèber por sigui e konseho aki a base di artíkulo 35 di Lei di salú públiko. Wes ta tuma e desishon final pa loke ta trata un outorisashon hudisial.

Si 14 dia promé ku bo fecha di biahe bo a permanesé den un pais di riesgo haltu, a base di e informashon aki bo lo tin ku tene kuenta ku e echo ku na momentu di entrada na Boneiru direktamente bo tin ku bai den karentena pa un durashon di 14 dia.

KUA TA E REGLANAN PA PASAHERONAN KU DEN TRÁNSITO TA BAHA KU NAN AVION NA BONEIRU?

Tanten ku e pasahero por keda na bordo di e avion, e reglanan di e destinashon final ta vigente. Si e tránsito ta dura mas tantu i ta pidi e pasaheronan pa baha for di avion i sinta den sala di embarke te ora di salida pa e siguiente destinashon, e reglanan di aeropuerto ta vigente (wak e protokól di Flamingo Internashonal Airport). Den kaso ku, pa sirkumstansianan imprevisto, tòg bo tin ku keda Boneiru, e ora ei e reglanan ta vigente manera nan ta pa biaheronan ku a bini Boneiru for di áreanan ku no ta seif. Durante e biahe naturalmente e reglanan di higiena di e kompania di aviashon ta vigente.

NA UNDA MI POR HAÑA E DEKLARASHON DI SALÚ I KON I NA UNDA MI TIN KU ENTREGÁ ESAKI?

Na e momentunan aki bo por download e formulario for di wèpsait di Schiphol, KLM i TUI. Dentro di poko ta habri un wèpsait kaminda por yena e formulario ‘online’.

Por manda e deklarashon di salú via imeil pa un adrès di imeil sentral di Entidat Públiko Boneiru ku a habri spesífikamente pa e meta aki (publichealth@bonairegov.com).

Bini tambe ku un vershon di e deklarashon di salú ku bo a prent ora bo ta bai biaha: den e fase di transishon pa e formulario ‘online’ nan por pidi bo pa entregá esaki na representante di e kompania di aviashon ku bo ta biaha kuné, òf un representante di departamentu di Salú Públiko na Flamingo Bonaire International Airpòrt.

NAN TA TÈST MI NA AEROPUERTO DI BONEIRU?

Na e momentunan aki ta konsehá pa promé ku salida laga hasi un tèst di PCR pa COVID-19, ora ku bo ta biaha pa Boneiru for di un pais pafó di e ‘air-bubble’, kualifiká komo seif. Den kaso ku departamentu di Salú Públiko ta haña ku ta nesesario ku na momentu di yegada bo tin ku pasa un tèst, e ora ei na e momentu ei nan lo determiná na unda lo hasi e tèst.

HENDENAN KU TA BIAHA SALIENDO FOR DI BONEIRU

KUA TA E KONDISHONNAN PA BIAHA FOR DI BONEIRU?

E kondishonnan pa baiha pa destinashonnan saliendo for di Boneiru ta kai bou di responsabilidat di bo destinashon. Wak e kondishonnan pa e pais di destinashon riba https://www.nederlandwereldwijd.nl/reizen,

òf tuma kontakto ku e kompania di aviashon ku bo ta biaha kuné, òf bo agente di biahe, òf wak riba un wèpsait di e pais di destinashon.

Ora ku bo ta biaha saliendo for di Flamingo Bonaire International Airport, bo tin ku tene bo mes na instrukshonnan di aeropuerto. Esakinan bo por haña akinan: http://www.bonaireinternationalairport.com/wp-content/uploads/2020/06/PR....

COVID-19 TÈST I MANEHO DI TÈST

KUA TA E MANEHO DI TÈST PA COVID-19 SI BO TA PERMANESÉ ÒF TA BIBA NA BONEIRU?

Serka tur persona ku e siguiente kehonan:

o Fèrkout di nanishi

o Nanishi ku ta kore

o Nistermentu

o Doló di garganta

o Tosamentu

o Sinti benout

o Kayente di kurpa

o Kentura

o Pèrdida diripiente di holó òf sabor

ta hasi un tèst di COVID-19. Tur hende ku tin keho respiratorio mester isolá nan mes te ora ku resultado di e tèst drenta.

KIKO E TÈST DI COVID-19 PROMÉ KU BIAHA PA BONEIRU MESTER KUMPLI KUNÉ?

Ta konsehá biaheronan ku ta drenta Boneiru i ku tin 13 aña òf mas laga hasi un tèst di COVID-19, 72 ora promé ku nan biaha. Esaki relashoná ku salú públiko di habitantenan di Boneiru.

E tèst aki mester kumpli minimalmente ku e siguiente kondishonnan:

- Solamente resultado di un tèst di PCR ta bálido. Pa e tèst aki ta hasi un sitologia (uitstrijkje) di nanishi i garganta ku un ‘q-tips’.

- Un laboratorio akreditá mester hasi e tèst.

- Resultado di e tèst no mag di ta mas bieu ku 72 ora na momentu di yegada na Boneiru.

NA UNDA MI POR LAGA HASI UN TÈST DI PCR PA COVID-19 NA HULANDA?

Aktualmente vários partido ta ofresé un tèst di PCR pa hendenan ku ta bai biaha. Aki bou ta sigui algun ehèmpel:

- KLM health services

- Het Huisartslab

- Saltro laboratorium

MI TA OBLIGÁ PA LAGA HASI UN TÈST DI PCR ORA MI TA BIAHA PA BONEIRU?

Boneiru no por pone obligatorio pa un hende ku ta bai biaha pa e laga hasi un tèst di PCR 72 ora promé ku e biaha. Fuertemente Gezaghèber ta konsehá hendenan ku ta biaha pa Boneiru pa laga hasi e tèst aki. Den esaki e ta hasi un apelashon riba sentido di responsabilidat di e biahero, na benefisio di su propio salú i salú públiko na Boneiru. Esaki relashoná ku e karakter di eskala chikitu di e isla i disponibilidat di fasilidat di kuido den region.

BO POR HASI E TÈST SERKA TUR PROVEEDOR DI ESAKI?

Boneiru ta konsehá hendenan ku ta biaha pa Boneiru pa 72 ora promé ku nan biaha laga hasi e tèst di COVID-19, ku bista riba salú públiko di habitantenan di Boneiru. Por lo tantu e tèst no ta obligatorio.

E tèst aki mester kumpli minimalmente ku e siguiente kondishonnan:

- Solamente resultado di un tèst di PCR ta bálido. Pa e tèst aki ta hasi un sitologia (uitstrijkje) di nanishi i garganta ku un ‘q-tips’.

- Un laboratorio akreditá mester hasi e tèst.

- Resultado di e tèst no mag di ta mas bieu ku 72 ora na momentu di yegada na Boneiru.

Den e deklarashon di salú ta pidi esaki.

UN TÈST KOMERSIAL POR TÈST POSITIVO TAMBE SI 3 LUNA PASÁ BO TABATIN CORONA, ASINA MI A LESA. ESAKI TA KUADRA?

Boneiru ta aseptá solamente resultado di tèst ku un laboratorio akreditá a hasi. Hasiendo asina e chèns riba un resultado positivo falsu, ta mas chikitu posibel. Den kaso ku bo tin un resultado positivo di e tèst di PCR, promé ku bo sali pa Boneiru, e ora ei tuma kontakto ku bo dòkter òf e outoridat di salubridat den bo pais, i sigui nan instrukshonnan mas aleu.

KARENTENA I ISOLASHON RELASHONÁ KU COVID-19

KI ORA BO TIN KU BAI DEN KARENTENA SENTRAL I KI ORA BO POR BAI DEN KARENTENA NA KAS?

Biaheronan ku ta bini for di paisnan ku un riesgo abou pa COVID-19, no tin keho i no tin otro partikularidat mas aleu, no tin mester di bai den karentena ora nan yega Boneiru.

Biaheronan ku maksimalmente 14 dia promé ku nan biaha pa Boneiru a permanesé na un pais di riesgo haltu, mester bai direktamente den karentena ora nan yega Boneiru. Tambe bo tin ku bai den karentena si un persona ku ta biba den mes kas ku bo of un hende ku bo tabata den kontakto personal direkto kuné, a tèst positivo pa COVID-19. E karentena ta tuma lugá den bo propio kas òf na un sitio di karentena indiká.

Den koperashon ku doñonan di hotèl na Boneiru a indiká un hotèl ku ta sirbi pa karentena sentral. Einan ta pone personanan pa kende nan situashon na kas no ta adekuá pa karentena. E gastunan di esaki ta pa kuenta di e persona ku nan a pone den karentena.

KI ORA BO TIN KU BAI DEN KARENTENA SENTRAL I KI ORA BO POR BAI DEN KARENTENA NA BO ADRÈS DI VAKASHON?

Biaheronan ku ta bini for di paisnan ku un riesgo abou pa COVID-19, no tin keho i no tin otro partikularidat mas aleu, no tin mester di bai den karentena ora nan yega Boneiru.

Biaheronan ku maksimalmente 14 dia promé ku nan biaha pa Boneiru a permanesé na un pais di riesgo haltu, mester bai direktamente den karentena ora nan yega Boneiru. Tambe bo tin ku bai den karentena si un

persona ku ta biba den mes kas ku bo òf ku a biaha huntu ku bo of un hende ku bo tabata den kontakto personal direkto kuné, a tèst positivo pa COVID-19. E karentena ta tuma lugá den bo propio kas òf na un sitio di karentena indiká.

Den koperashon ku doñonan di hotèl na Boneiru a indiká un hotèl ku ta sirbi komo karentena sentral. Einan ta pone personanan pa kende nan situashon na kas òf nan adrès di vakashon no ta adekuá pa karentena. E gastunan di esaki ta pa kuenta di e persona ku nan a pone den karentena.

KI ORA BO TIN KU BAI DEN ISOLASHON I BO POR BAI DEN ISOLASHON NA BO ADRÈS DI VAKASHON?

Si bo tin keho ku ta kuadra ku COVID-19, ta pidi bo pa keda paden, limitá kontakto ku hendenan di kas te na un mínimo i no risibí bishita. Esaki nos ta yama isolashon. Tuma kontakto ku departamentu di Salú Públiko di Boneiru (+599) (0) 800 – 13 51 relashoná ku hasimentu di un tèst di PCR.

Isolashon ta tuma lugá den e kas di vakashon, kamber di hotèl, den propio kas òf na un sitio di isolashon indiká si e situashon na e adrès di vakashon no ta adekuá pa isolashon. Den koperashon ku doñonan di hotèl na Boneiru a indiká un hotèl ku ta sirbi komo sitio di isolashon. E gastunan di esaki ta pa kuenta di e persona ku nan a pone den isolashon.

KI ORA BO TIN KU BAI DEN ISOLASHON I BO POR BAI DEN ISOLASHON NA KAS?

Si bo tin keho ku ta kuadra ku COVID-19, ta pidi bo pa keda paden, no risibí bishita i limitá kontakto ku hendenan di kas te na un mínimo. Esaki nos ta yama isolashon. Tuma kontakto ku departamentu di Salú Públiko di Boneiru (+599) (0) 800 – 13 51 relashoná ku hasimentu di un tèst di PCR.

Isolashon ta tuma lugá den bo propio kas òf na un sitio di isolashon indiká si bo situashon na kas no ta adekuá pa esaki. Den koperashon ku doñonan di hotèl na Boneiru a indiká un hotèl ku ta sirbi komo sitio di isolashon sentral. ZVK ta karga e gastunan pa esaki pa habitantenan di Boneiru ku ta sigurá via ZVK.

PA TUR HENDE KU TA BIBA NA BONEIRU I TA PERMANESÉ (TEMPORALMENTE) NA BONEIRU

KUA TA E REGLANAN DI KOMPORTASHON KU TUR HENDE NA BONEIRU MESTER KUMPLI KUNÉ?

Tur hende na Boneiru, habitantenan i bishitantenan, mester kumpli ku e siguiente reglanan di komportashon i higiena:

- Mantené 1,5 meter di distansia for di personanan ku no ta forma parti di bo hendenan di kas.

- Regularmente laba bo mannan ku awa i habon: usa produkto pa desinfektá man solamente ora no tin awa i habon disponibel.

- No pone bo mannan na bo kara.

- No duna otro hende man.

- Tosa òf nister den bo èlebog.

- Usa lensu di papel, tira esaki afó despues di uso.

- Keda kas (no bai traha, no bai skol, no bai kaya pa por ehèmpel hasi kompra ora bo tin ku kontestá positivamente riba un di e siguiente preguntanan:

· Durante e último 24 ora òf na e momentu aki bo tin un òf mas di e siguiente kehonan: fèrkout di nanishi, nanishi ku ta kore, nistermentu, doló di garganta, tosamentu leve, sinti benout, kayente di kurpa, kentura i/òf pèrdida diripiente di holó òf sabor?

· Bo tabatin e vírùs di corona nobo (determiná ku un tèst di laboratorio) i a determiná esaki den e último 7 dianan?

· Tin hende di kas ku e vírùs di corona nobo (determiná ku un tèst di laboratorio) i den ménos ku 14 dia bo tabatin kontakto ku e hende di kas aki, miéntras ku ainda e tabatin keho?

· Bo ta den karentena na kas, pasobra bo tabatin kontakto direkto ku un persona serka kende nan a determiná e vírùs di corona nobo?

· Si durante e último 14 dia bo a biaha pa paisnan ku no ta Aruba-Kòrsou-Saba-St. Eustatius-St. Maarten, Hulanda, Alemania, Fransia, Bélgika i Luxemburg.

KI KORA MI TIN KU BISTI UN TAPABOKA (MONDKAPJE)?

Na Boneiru bo tin ku bisti un tapaboka (mondkapje) ora no ta posibel pa mantené un distansia di 1,5 meter for di otronan, ku no ta forma parti direkto di bo hendenan di kas. Banda di esei semper bo tin ku bisti un tapaboka (mondkapje) ora ku bo yega Boneiru òf ora bo ta sali for di Boneiru na Flamingo Bonaire International Airport i durante bo transporte pa bo adrès di vakashon.

KUA NUMBER MI POR YAMA ORA KU MI TIN KEHO RELASHONÁ KU COVID-19 I KIKO TA PASA E ORA EI?

Ora bo tin e siguiente kehonan:

o Fèrkout di nanishi

o Nanishi ku ta kore

o Nistermentu

o Doló di garganta

o Tosamentu

o Sinti benout

o Kayente di kurpa

o Kentura

o Pèrdida diripiente di holó i sabor

bo tin ku tuma kontakto ku departamentu di Salú Públiko via number di telefon (+599) (0) 800 – 13 51. Sigui e instrukshonnan ku bo ta haña einan. Si nan por konfirmá bo kehonan, nan lo regla ku bo ta bai hasi tèst pa COVID-19. Ta importante pa bo isolá bo mes si bo tin keho respiratorio. Esaki ta enserá ku bo ta keda kas, no ta risibí bishita i ta limitá kontakto ku bo hendenan di kas te na un mínimo.

KEN TA PAGA E GASTUNAN SI MI TA KONTAGIÁ KU COVID-19 ÒF MESTER BAI DEN KARENTENA?

Si nan imponé un medida di karentena riba bo, bo mes ta responsabel pa e gastunan ku ta embolbí ku esei.

Si nan pone bo den isolashon, e ora ei esei ta gastu di malesa: si bo seguro di gastu di malesa ta kubri esei ta dependé di e kondishonnan di bo kompania di seguro di malesa. Pa habitantenan di Boneiru ku ta sigurá via ZVK, ZVK ta kubri e gastunan di isolashon. Pa otronan ta akonsehabel pa kontrolá bon serka bo kompania di seguro kua gastu nan ta kubri.

PREGUNTANAN GENERAL

DIKON NA BONEIRU OTRO REGLA TA VIGENTE KU NA KÒRSOU I/ÒF ARUBA?

Kada isla ta stipulá su propio instrukshonnan pa por drenta e isla, di manera ku esakinan ta konektá mas mihó posibel ku e situashon lokal i di manera ku nan ta kuadra ku kompetensianan di gobièrnu di e islanan.

Kontinuamente ekspertonan i trahadónan di maneho di e 6 islanan ta den konsulta ku otro i tambe ku Hulanda tokante e instrukshonnan pa drenta e islanan. Mas tantu posibel ta sinkronisá e reglanan ku otro.

A BASE DI KIKO TA KONSIDERÁ KU UN PAIS TA ‘SEIF’ ÒF ‘DI RIESGO HALTU’?

Kada dos siman a base di konsehonan di RIVM ta pone den balansa kua ta e paisnan ku mester konsiderá komo seif i kua ta e paisnan ku mester konsiderá komo di riesgo haltu, den relashon ku kapasidat di kuido di salú di e isla.

DIKON NO TIN UN ORDENANSA KU POR HASI POSIBEL PA IMPONÉ E MEDIDANAN ?

For di basta tempu Boneiru no konosé kasonan di COVID-19. Tanten ku habitantenan i bishitantenan di Boneiru ta asumí nan responsabilidat i kumpli ku e kriterionan pa biaha pa Boneiru i e medidanan di komportashon preskribí, no ta nesesario pa disponé di un ordenansa di emergensia. Ora ku konstatá ku no ta kumpli ku e kriterionan i medidanan di komportashon, Gezaghèber por disidí pa bolbe bini ku un ordenansa di emergensia.

KON BON KAPASIDAT DI KUIDO TA NA ÒRDU NA BONEIRU?

Boneiru huntu ku dòkternan di kas, hòspital, salú públiko, laboratorionan i Entidat Públiko Boneiru na fin di yüni a kontrolá tur aspekto di kuido relashoná ku COVID-19. Por ehèmpel a wak maneho di tèst, investigashon di fuente i kontakto, maneho di karentena i isolashon i kuido agudo / médiko. Riba tur e puntonan aki a konkluí ku en prinsipio nan ta sufisientemente organisá, di manera ku por spera ku konfiansa riba fleksibilisashon di e medidanan.

KUA TA E PROTOKÒLNAN KU AKTUALMENTE TA VIGENTE?

A base di konseho di RIVM, Boneiru a formulá algun regla di komportashon i medida pa entrada na Boneiru. A base di esakinan den koperashon estrecho ku departemantu di Salú Públiko a formulá e siguiente protokòlnan: - Protokòl general pa turismo: https://www.tourismbonaire.com/includes/2020-covid19-tourist-protocol.pdf

- Protokòl pa Flamingo Bonaire International Airport: http://www.bonaireinternationalairport.com/covid-19-protocols-at-bonaire... - Protokòl pa Haf di Boneiru: dentro di poko ta pone esaki riba: www.tourismbonaire.com

Por haña e protokòlnan aki komo anekso serka e Roadmap Bonaire COVID-19, ku dentro di poko lo keda publiká.

Banda di esei organisashonnan individual i empresanan a formulá nan propio protokòlnan: tokante esaki nan ta komuniká via nan propio kanalnan.

KUANTU TEMPU INFORMASHON DI TURISTA MESTER KEDA WARDÁ?

Pa investigashon di fuente i kontakto ta importante ku maksimalmente 14 dia despues ku e bandoná Boneiru ainda por aserká un turista den kaso ku konstatá kontagio ku COVID-19 serka un hende ku kende e turista aki posibelmente tabata den kontakto. Pa e motibu aki departamentu di Salú Públiko ta warda informashon i kontakto di bishitantenan di Boneiru te 14 dia despues ku nan bandoná nos isla.

Nos hotèlnan, ‘resort’-nan i transportadónan di turista ta traha ku un diario (logboek) den kua nan ta nota tur posibel momentu di kontakto ku i entre e turistanan. Esaki tambe mester keda wardá te 14 dia despues ku e turista bandoná nos isla.

NOS TA BAI DIREKTAMENTE DEN ‘LOCKDOWN’ ATROBE SI BINI OTRO INFEKSHON?

Pa Boneiru tambe un posibel konstatashon di infekshon ku COVID-19 ta un realidat. Boneiru a traha duru riba ampliashon di kapasidat di kuido, di manera ku nos ta bon prepará pa un posibel kaso di infekshon den futuro i nos no tin mester di bai direktamente den ‘lockdown’ ora un kaso di infekshon presentá su mes.

Dependiente di e situashon lo wak si tin mester di medida i kua medida ta nesesario pa protehá poblashon di Boneiru kontra un brote di infekshon ku COVID-19. Pa esaki a elaborá vários senario. E ora ei den esaki no solamente ta tuma e situashon di Boneiru na konsiderashon na e momentu ei, pero tambe esun di e paisnan for di kua hendenan por biaha pa Boneiru.

KIKO TA BIRA E PERIODO ENTRE ANUNSIO DI UN PROHIBISHON PA BULA SI ESAKI TA NESESARIO I MI POR BIN KAS BÈK AINDA E ORA EI?

Si ta nesesario pa bini ku un prohibishon pa bula (limitá), no por duna garantia ku ainda bo por bin kas bèk, si bo ta biba na Boneiru. Den práktika semper tin un periodo promé ku realisashon di un prohibishon pa bula. Bo lo por usa e periodo ei pa regresá Boneiru, pero pa esaki tampoko no por duna garantia.

Por lo demas bo tin ku tene kuenta tambe ku e situashon den e paisnan pa kua bo ta biaha: por sierto nan tambe por pone un paro na tur tráfiko aéreo. Den e kaso ei tampoko no ta duna garantia ku bo por bin Boneiru bèk.

KON TA KONTROLÁ KU MAKSIMALMENTE 1000 PASAHERO TA DRENTA BONEIRU PA SIMAN?

Esaki ta tuma lugá pa medio di monitoriá e buelonan ku ta drenta na Boneiru. Por ampliá òf redusí e kantidat di pasahero, kaminda e relashon entre e kantidat di posibel infekshon i kapasidat di kuido di salú di Boneiru lo ta e punto di salida.

KON NOS TA BAI ANDA AWORÓ KU PASAHERONAN KRUSERO ORA KU BARKUNAN KRUSERO BOLBE KUMINSÁ MARA NA BONEIRU?

Por lo pronto no ta konosí ki dia barkunan krusero ta bolbe bin Boneiru. Asina ku esaki bira konosí, gobièrnu lo pone e riesgonan di infekshon ku COVID-19 ku ta akompañá esaki, den kombinashon ku kapasidat di kuido di salú na Boneiru, den balansa i preskribí medidanan adekuá. Na e momentunan aki e medidanan di komportashon ta vigente pa tur hende na Boneiru, tantu habitantenan komo bishitantenan, i por lo tantu pa bishitantenan tambe ku ta yega aki ku barku.

PREGUNTA TOKANTE RIESGO DI INFEKSHON KU COVID-19

KON GRANDI E RIESGO TA KU UN HENDE TA BINI BONEIRU KU INFEKSHON, KU E MEDIDANAN KU A TUMA?

A base di e situashon epidemiológiko di un pais òf estado for di kua biaheronan ta bini, por hasi un kalkulashon di e riesgo di introdukshon di COVID-19 den e pais di destinashon. For di paisnan kaminda e prevalensia (prevenshon di e vírùs) ta haltu, e chèns pa haña un turista ku COVID-19 naturalmente ta mas haltu ku for di un pais kaminda e prevalensia ta abou.

Pa laga e chèns ku un hende ku ta infektá ku COVID-19 ta mas abou posibel, ta tuma e siguiente pasonan:

- ta apuntá un kantidat limitá di pais ku un prevalensia abou pa COVID-19, for di kua bo por biaha pa Boneiru,

- ta supliká kada biahero pa yena un deklarashon di salú,

- ta konsehá biaheronan di 13 aña òf mas pa laga hasi un tèst di PCR di COVID-19, maksimalmente 72 ora promé ku biaha.

E medidanan aki ta sòru ku e riesgo ku un hende infektá ta bini Boneiru, ta aseptabel den relashon ku kapasidat di kuido na Boneiru.

KON GRANDI E CHÈNS TA KU BO TA INFEKTÁ KU COVID-19 SI BO TIN SÍNTOMA?

Na e momentunan aki ménos ku 1% di hendenan for di Hulanda ku tin síntoma ku lo por ta un indikashon di un infekshon ku COVID-19, ta tèst positivo pa COVID-19

Contact
Bestuurskantoor Openbaar Lichaam Bonaire
Plasa Reina Wilhelmina 1
Kralendijk
T +599 717 5330

Klik hier voor de contactgegevens van alle diensten van het OLB