Text Size

Font size:  
  • Increase
  • Decrease
  • Normal

Current Size: 100%

Awe tantu aña pasá, despues ku Amerigo Vespucci a perde riba oseano Atlantiko e tabata masha agradesido despues ku e indjan nan ku tabata habitá na Boneiru, a deskubrie. Ela haña hopi ayudo di e indjan nan, ela haña kuminda i a siñe kon e mester sobreviví riba e isla aki ku e rikesanan di nos isla. Asina a kuminsa interkambio di nashon, di kultura i di identidat. Riba e dia spesial aki nos ta bini huntu komo Boneriano pa selebrá e dia di e isla ku nos tur ke mira prosperá i bai dilanti.
 
Nos konosé diferente ekspreshon kultural manera baile, kuminda, músika pero tambe parti di nos kultura ta tur loke nos a pasa aden pa yega kaminda nos ta awor aki. E ta patronchinan di komportashon i interkambio, konstrukshonnan kognitivo i konosementu ku un komunidat ta kompartí ku otro i ku a siña esakinan pa medio di sosialisá ku otro. Kultura ta enserá bo religion, kuminda, loke bo ta bisti, kon bo ta bisti esaki, nos idioma, músika, loke den nos bista ta bon òf malu, kon ta sinta na mesa, kon ta kuminda otro, kon nos ta trata nos sernan kerí, e sistema ku bo ta eduká bo yunan i hopi akto mas. E konsepto kultura ta enserá hopi diferente akshon i si nos para ketu un ratu... e  akshonnan aki ta definí ken nos ta. Nos kultura ta yená ku elementonan partikular. BON DIA, BON SIMAN. Ku un karakter semper kontentu ku speransa den e ser supremo pa tur dia nos por sigui aportá di un mihó manera na nos próhimo.
Tresiendo asina un diversidat di ekspreshonnan kultural ku ta adoptá i adaptá pa asina enrikesé aun mas nos kultura Boneriano.
 
E último tres añanan nos poblashon a krese ku kasi mil persona tur aña. E komunidat ta konsistí di diferente nashonalidat. Nos hóbennan di awendia tin un otro sistema kompará ku esun di nos grandinan. Esaki ta hiba mi na e punto ku nos kultura ta dinámiko. E ta keda forma i adaptá na e konstelashon di e grupo di hendenan ku ta forma e nashon.
Kultura ta pa hiba nos rekonosé nos identidat i mas amor pa nos nashon.
 
E  konsepto di nashon ta un komunidat ku ta bini huntu pa un meta. E ironia di bida ta ku e aña aki tabatin hopi diskushon tokante e sitio ku ta selebrá dia di Boneiru, algun a kuestioná e kambio i otro a aploudí esaki. Bo por kuestioná ku esaki no ta e pensamentu di un nashon ku e mesun meta.
Mi mes persona ta di opinion ku no ta importá unda nos selebrá dia di Boneiru logístikamente, loke ta importante ta ku e nifikashon di e selebrashon ta bon kla den nos mente i kurason. Nos meta komun ta pa nos selebrá e dia di Boneiru en grande huntu. Sea ta na Rincon, Nikiboko, Nort Saliña, Playa, Tera Cora òf Antriol.
Loke ta primordial ta e union ku mester reina bou di nos tur komo habitantenan di Boneiru. Nos tin ku mira interes komun di Boneiru i kada persona ta responsabel pa duna di su parti pa stimulá desaroyo di nos isla.
 
E union aki ta loke ta permití nos pa fiha metanan komun, manera:
Nos naturalesa, ku pa dékada kaba a bini ta gosa di rekonosementu mundial debí na entre otro nos parke marítimo ku ta kualifiká den mundu komo un di e mihónan.
Sin embargo nos mester realisá komo nashon ku e base fuerte pa mantenshon i desaroyo di nos isla ta sintá den nos kultura.
 
Nos ta un pueblo chikitu, apénas 20000 habitante, tur dia e isla ta kresiendo no ku boneriano so pero ku personanan di diferente nashonalidat. Un nashon, unda esnan ku su lombrishi ta derá aki ta kompartí ku esnan di tur e binti piku otro nashonalidatnan ku a hasi di nos dushi Boneiru nan kas. Nan tur a skohe pa forma parti di nos komunidat. Huntu, di e manera aki, nos tur ta forma un nashon. Den e kaso aki un nashon ta un grupo di persona ku ta uní debí na sea desendensha, historia, kultura, lenga, òf e lugá ku nan ta habitá huntu. Sin mira e diferensha den nashonalidat nos tur ta biba riba e mesun isla i nos ke pa esaki progresá. Mi ta kere ku nos tur ta boga pa esaki, den e parti aki nos ta di e mesun pensamentu, deseo i vishon, kisas nos ta diferenshá den e manera òf método ku kada un ke usa pa logra esaki, pero e meta ta komun. Un Boneiru ku tin un infrastruktura optimal, ekonomia kresiente i situashon sosial fuerte. Komo nashon nos ta visualisá pa krese ku mantenshon di naturalesa i kultura. Nos kultura ta un manifesto di ken nos ta, kultura ta dinámiko i ta kambia segun e generashon ta kambia. E esensia si ta keda meskos, e base no ta kambia. Ta importante pa nos mantené nos herensia intangibel i tangibel ku ta partinan esensial di nos kultura. Na mes momentu mester tin e espasio pa nos hóbennan adoptá esakinan i adaptá pa asina nan tambe por sinti nan parti di esaki.
 
Mi ke terminá invitando tur persona pa evaluá i tuma akshon pa ta parti di un plan pa yuda Boneiru bai dilanti. E gobiernu aki a skohe pa planta simia ku ta fertil, pa asina enrikese su kultura. Esaki saliendo for di e punto di bista, ku esnan ku planta flor, lo kosecha perfume. Esnan ku planta maishi, lo kosecha hariña pa traha repa i pan, esnan ku planta amor lo kosecha amistat, esnan ku planta alegria lo kosecha felisidat. Ta esaki nan e gobiernu aki ta para pe. Nos ke sembra fe den nos desaroyo, fe den nos kultura i identidat, fe ku nos lo tin un komunidat sano i balansa, pa asina abo i ami lo por habri brasa i yama nos mes sembrado di simia positivo.
Mi ta deseá komunidat kompleto ku mi stima, un felis dia di Boneiru