Text Size

Font size:  
  • Increase
  • Decrease
  • Normal

Current Size: 100%

Kralendijk - E departamentu di Komunidat i Kuido ku ta resortá bou di e direktorado di Supervishon i Mantenshon di Lei kier a urgi tur persona ku di un manera òf otro ta bini den kontakto ku kuminda i/òf bebida durante e aktividatnan di ‘’Dia di Rincon’’, pa hasi e trámitenan nesesario pa promé ku e aktividatnan aki tuma lugá, logra saka e asina yamá karchi di sanidat òf karchi blou. E último dia pa realisá e trámitenan pa saka karchi di sanidat den kuadro di e selebrashonnan di Dia di Rincon, ta djaweps awor dia 13 di aprel 2017.

E karchi blou aki ta fungi komo bo pasaporte pa drenta i traha den kualke kushina, stènt, truk of lokalidat kaminda e persona ta bini den kontakto ku produktonan alimentisio. Sin e karchi aki ta bira imposibel pa traha den e sektor kaminda ta atendé ku produktonan alimentisio.

Tambe e persona(nan) konserní mester sòru pa un bon higiena personal i pa un bon higiena di e espasio kaminda ta bai prepará i bende kuminda, bebida òf kos di boka dushi. Ta kontrolá i garantisá seguridat di kuminda a base di e programa HACCP ku internashonalmente ta keda implementá.

Direktorado di Supervishon i Mantenshon di Lei na nòmber di gobièrnu ta responsabel pa salbaguardiá salú públiko pa medio di programanan di konsientisashon i kontròlnan ku nan ta efektuá durante e temporada aki. E departamentu konserní ta realisá kontròlnan rutinario i tambe ta duna konseho basá riba petishonnan ku ta drenta personalmente, via telefon of e-mail na nos ofisina. Nos ta registrá tur keho- i aviso ku drenta serka nos i nos ta trata nan komo  prioridat.

Pa más informashon por tuma kontakto ku e departamentu di Komunidat i Kuido via +5997174800 of bisami_th@bonairegov.com. Por pasa serka e departamentu aki na Kaya Korona 89.