Text Size

Font size:  
  • Increase
  • Decrease
  • Normal

Current Size: 100%

Ekonomia di Boneiru ta basá prinsipalmente riba turismo. Banda di e hopi sambuyadónan i otro turistanan, míles di hende ta bishitá Boneiru durante temporada krusero desde òktober te ku aprel. Dos empresa grandi ku ta di balor ekonómiko grandi pa Boneiru ta Cargill Salt i Bonaire Petroleum Corporation N.V. (Bopec). Gobièrnu ta e dunadó di trabou mas grandi riba e isla. Na Boneiru no tin hopi agrikultura, pasobra tin sirkunstansianan difísil (sekura, pèster, suela duru). Ta importá mayoria produkto. Entidat Públiko ta responsabel pa desaroyá mas aleu e perspektivanan ekonómiko di Boneiru i relashonnan ekonómiko ku otro islanan.

Stimulá aktividat ekonómiko i hasimentu di negoshi ta importante pa Boneiru. Gobièrnu ta stimulá kresementu ekonómiko, ku bista riba naturalesa, medio ambiente i hende. E meta ta pa desaroyá na un forma duradero, di manera ku nos ta mantené Boneiru bunita pa nos mes hendenan i pa bishitantenan. Tin areglonan pa promové desaroyonan sosial-ekonómiko, pa yuda empresanan chikí i pa krea kupo di trabou. Tambe ta stimulá desaroyonan riba terenon di turismo, transporte, empresanan públiko di utilidat.